Пяціразовы чэмпіён свету па гіравым спорце Ігар Сігневіч, майстар спорту міжнароднага класа з 21-гадовым стажам папрасіў віцэ-прэм'ера Уладзіміра Караніка прысвоіць яму ганаровае званне «Заслужаны майстар спорту Рэспублікі Беларусь». Чыноўнік яго прашэнне не задаволіў праз вялікую колькасць адміністрацыйных правапарушэнняў, піша «Мінская праўда».
— З 2019 года працую ў сістэме адукацыі. Сутнасць звароту простая: хацеў папрасіць, каб падтрымалі хадайніцтва наконт прадстаўлення да ўзнагароджання ганаровым званнем «Заслужаны майстар спорту Рэспублікі Беларусь», — растлумачыў мужчына на прыёме грамадзян у віцэ-прэм'ера Уладзіміра Караніка ў Пухавіцкім раёне.
— Званне чэмпіёна вы атрымалі. Але трэба разумець, што «Заслужанага майстра спорту Рэспублікі Беларусь» прысвойваюць не толькі за спартыўныя дасягненні. Гэта ганаровае званне, якое большае за медалі і тытулы. Гэта прыклад ва ўсіх сферах для будучых спартоўцаў. Але 25 вашых адміністрацыйных правапарушэнняў — гэта перабор. Тэндэнцыя гэтая захоўваецца ўжо тры гады. Вы з зайздроснай рэгулярнасцю становіцеся фігурантам адміністрацыйнага працэсу, — адзначыў Уладзімір Каранік.
Заяўнік паабяцаў выправіцца.
— Сёння лепш вучыць на сваім прыкладзе. А з гэтым ёсць пакуль пытанні. У сферы спорту, вядома, дабіліся каласальных вынікаў. Але многія думаюць: раз чэмпіён — значыць, усё можна… У Беларусі перад законам усе роўныя. Званне, пра якое вы просіце, прысвойвае кіраўнік дзяржавы. Як мы растлумачым вашыя 25 парушэнняў? — пацікавіўся віцэ-прэм'ер.
Намеснік прэм’ер-міністра запэўніў, што дасягненні Ігара Сігневіча заўсёды будуць мець значэнне для краіны.
— Ніхто іх пад сумнеў не ставіць, але нешта зрабіце з вашымі парушэннямі. І тады мы зможам ужо вярнуцца да гэтага пытання і разумець, што чалавек усведамляе наступствы сваіх дзеянняў і можа асабістым прыкладам паказаць, што і ў дарослым узросце людзі мяняюцца ў лепшы бок, — рэзюмаваў Уладзімір Каранік.